Pas betimit të Arta Vorpsit si anëtare e Gjykatës Kushtetuese, ka reaguar vetë noterja e cila legalizoi letrat që në mënyrë të argumentueshme anti-kushtetuese, i hapin rrugën Vorpsit drejt këtij institucioni kyç në vend.
Noterja Miranda Xhemalçe theksoi se ka bërë vetëm detyrën e saj, siç do e bënte me çdo qytetar tjetër.
Noterja pohoi për ABC News se detyra e saj ligjore është që të legalizojë nënshkrimet në dokumente, sipas ligjit dhe dëshirës së qytetarëve.
“Në bazë të nenit 62, gërma ë, që kam të drejtë të legalizoj nënshkrimet e shtetasve të vëna në dokumeta të ndryshme. Kam legalizuar vetëm nënshkrimin e Arta Vorpsit. Kjo është detyra ime dhe unë nuk mund ta refuzoj. Edhe ju mund të më vini, çdo qytetar mund të më vij dhe unë e detyruar të legalizoj nënshkrimin e saj. U paraqit me kartë identiteti, verifikova Artën, vërtetova të dhënat e saj, unë kam bërë vetëm vërtetimin e firmës së saj, emër mbiemër”, shprehet noterja.
