Kryetari i Partisë Demokratike, Sali Berisha ka marrë pjesë në një ekspozitë kushtuar poetëve Vilson Blloshmi dhe Genc Leka, që po zhvillohet në godinën e ish-të përndjekurve politikë, përballë Parlamentit.
Ekspozita mbahet në kuadër të 45-vjetorit të pushkatimit të poeteve Blloshmi dhe Leka dhe i kushtohet jetës dhe veprës së tyre. Në fjalën e tij për mediat, Berisha i quajti poetët diamantë të letërsisë.
“Për sakrificën dhe veprën e pavdekshme të dy poetëve të rinj, vëllezërve siamezë në idealet e tyre të lirisë, gjeni në krijimet e tyre letrare. Leka dhe Blloshmi kanë lënë një trashëgimi do të thosha nga më të shkëlqyerat në letërsinë dhe poezinë tonë si në rrafshin artistik dhe në domethënien e kohës, në të cilën ato janë shkruar. Askush gjer sot nuk ka paraqitur, nuk ka stamposur Shqipërinë e diktaturës, siç ka bërë Vilson Blloshmi tek Saharaja e tij, apo kohën Genc Leka në poezitë e tij. Ato janë një tufë krijimesh, në kuptimin më të vërtetë të fjalës, diamante në letrat tona. Poezitë e tyre mund t’i krahasosh me krijimet me të bukura në letërsinë tonë. Ato janë krijime të dy të rinjve me guxim se i thonë diktaturës në sy atë se çfarë ishte ajo”, tha Berisha.
