Kryedemokrati Sali Berisha deklaroi në konferencën me gazetarët se kryeministri Edi Rama po bën një betejë të turpshme me ambasadoren amerikane, Yuri Kim për të zgjedhur Edvin Kondilin në krye të SPAK.
Berisha tha nga selia blu se nuk i takon një kryeministri se kush qëndron në krye të SPAK, teksa shton se po e asgjëson institucionin e lartë me ndërhyrjen e tij.
“Kurrë në histori, as në romane, nuk mund të gjeni një betejë të turpshme midis një kryeministri dhe një ambasadori që në ligj nuk kanë lidhje me emërimin e kryetarit të SPAK. A keni dëgjuar ndonjëherë betejë të kryeministrit në emërtimet e prokurorit të përgjithshëm? Kurrë. Kjo është historia më e turpshme. Ç’punë ka një kryeministër se kush emërohet në krye të SPAK? Ka vetëm dosjen e tij, dosjen e djegësve ku ka firmosur Edi Rama dhe prandaj ai përpëlitet dhe bën këtë figurë të turpshme. Me ligj kryetari i SPAK ka vetëm një funksion, të ndajë dosjet, nuk i ndërhyn dot prokurorit.
Bota e krimit drekon dhe darkon prej dy muajsh me eksponentë të krimit të organizuar në Shqipëri që janë në Parlament. Kurrë ndonjëherë nuk ka ndodhur kjo. Drejtorit të SHISH që e ka emëruar vetë ia mbyll derën si bandit. Për organin e akuzës thotë “o Kondili o rafsha e mos u vrafsha”. Po e asgjëson këtë institucion.
Të thërrasësh Aldo Bumçin për një falsifikim të bërë, vetëm e vetëm se gjoja po heton Sali Berishën apo djalin e tij është turp kombëtar. SPAK po sillet si repart i turpshëm i Edi Ramës dhe i Taulant Ballës”, tha Berisha.
Kujtojmë se ditën e djeshme Gijotina.com raportoi ekskluzivisht se Edi Rama ka ndërhyrë për të emëruar të preferuarin e tij Edvin Kondilin në krye të SPAK, në mënyrë që të lëvizë “fijet” e institucionit të lartë, sipas dëshirës së tij.
