Ish-kryeministri Sali Berisha iu ka bërë thirrje të gjithë deputetëve të Partisë Demokratike, të cilët kërkuan dorëheqjen e Lulzim Basha, pas rezultatit tronditës në zgjedhjet e 6 marsit, që t’i bashkohen asaj, që Berisha e quan opozita e vërtetë.
Berisha tha se kushti i vetëm për këta deputetë të PD që t’i bashkohen atij, është dhe mbetet vetëm vota e lirë, ndërsa shtoi se Basha nuk e jep dorëheqjen nga PD, pasi ai është një peng.
“Kam ndjekur zhvillimet brenda selisë së Lul Bravës dhe bunkerit të blinduar. Vlerësoj e përshëndes qëndrimet e deputetëve të PD, të cilët sapo konstatuan me fakte se brava-opozita është një opozitë falso, e shtirë, ata shprehën qëndrimet e tyre të drejta, kërkuan vendime, që Lul Brava nuk i merr kurrë, sepse nuk e lejojnë. Unë i ftoj ata të bashkohen me elektoratin e tyre, të bashkohen me PD, të kontribuojnë në konsolidimin e saj. I garantoj plotësisht se ligji i pandryshueshëm dhe i vetmi kusht i këtij bashkimi është dhe mbetet vota e lirë. Çdo njeri që pranon votën e lirë si mekanizëm, bashkimi midis demokratëve që janë të vendosur të qëndrojnë si opozitarë të vërtetë, është shumë i mirëpritur të bashkohet me ne. A jep dorëheqjen Lul Brava? Unë them që ai është një peng, që nuk e ka në dorë veten e tij, por keqpërdoret e keqshfrytëzohet deri në fund, sa të mos mbetet asgjë tek ai”, tha Berisha.
