Ish-kryeministri Sali Berisha, një nga figurat emblematike të tranzicionit shqiptar ka thënë se nuk do të shkruajë kujtime, por herë pas here ai u rikthehet kujtimeve të viteve ’90. Në një aktivitet zhvilluar sot në hotel Rogner ai ka pranuar se iu fut politikës pa pasur njohuri mbi të. Një libër me fjalime të ish-presidenti amerikan Ronald Regan ka qenë ndoshta libri që i ka dhënë Berishës leksionet e para të politikanit. Ai e ka pranuar vetë sot këtë ndikim gjatë promovimit të librit të “Pse Liberalizmi” të Tom G. Palmer. Duke folur lëvizjen e vitit ’90 ai tha se të gjithë udhëhiqeshin nga instikti i Lirisë. “Idhulli ishte vetëm një- ishte Ronald Regan. Aso kohe, një mik i imi amerikan, më dhuroi një libër të vogël, me pjesë nga fjalimet e Reganit. Nga tezat kryesore të tij ishte se qeveria është problem dhe unë çdo ditë duke i besuar verbërisht atij, shikoja se ç’problem po krijon qeveria. Lexoja se paraja në kontot dhe xhepat e individit është më e çmuar sesa në buxhetin e shtetit dhe në një betejë të paepur me FMN vendosa TVSH e dytë më të ulët në botë 12.5%. Besova dhe vazhdoj të besoj shumë te taksat e ulta”, tha Berisha.
