Ish kryeministri Sali Berisha ka denoncuar kreun e qeverisë Edi Rama për deklaratën e bërë lidhur me investitorin që do të ndërtojë Portin e jahteve në Durrës, i cili është zmbrapsur nga opozita dhe qytetarët në Zagreb për të anuluar projektin për Manhatanin e Zagrebit.
Berisha duke iu referuar reagimit të Ramës, thotë se kryeministri “mashtron nga babëzia”. Gjithashtu, Berisha paralajmëroi sot se të gjitha kompanitë që do të bëjnë punime si nënkontraktorë në portin e Durrësit, do të futen në listën e zezë.
“Përshëndes qytetarët e Zagrebit që hodhën në kosh të plehrave “Manhatanin e Eagle Hills”, një kompani e cila e lidhur me vëllezërit Kariç, të gjithë të lidhur me Lukashenkon dhe Vuçiçin. Rama paraqiste mbrëmë Eagle Hills si kompania do ndërtojë Manhatanit të Zagrebit, ndërkohë që qytetarët e kishin hedhur në kosh të plehrave. Shikoni ku e çon lakmia për portin e Durrësit, të mashtrojë publikisht qytetarët që kësaj kompanie i është besuar ndërtimi i Manhatan në Zagreb. Ajo histori është mbyllur dy vite më parë. Përveç kësaj kryebashkiaku i Zagrebit kishte hapur garë se nuk e kishte të vetën kompaninë. Rama nuk e hap garë se e ka të vetën kompaninë. Qytetarët nuk mund të pranojnë të qëndrojnë duarkryq ndaj këtyre akteve që tejkalojnë çdo imagjinatë. PD do të përdorë të gjitha format për të kundërshtuar këtë plaçkitje të pronës publike më të çmuar që sot kanë shqiptarët. Porti mijëvjeçar është prona publike më e çmuar se çdo pronë tjetër publike në këtë vend. Ne do t’u primë të gjitha nismave për dështimin e këtij projekti. Jam sot këtu për të paralajmëruar se çdo kompani ndërtimi që do të marrë pjesë në këtë projekt do të futet në listën e zezë. I paralajmëroj të mos shndërrohen në shushunja për të vjedhur një pronë publike. Po regjistrohen nënkontraktorë në Durrës tani”, tha Berisha.
