Ish-kryeministri Sali Berisha nga foltorja e Kuvendit ka ‘uruar’ pasardhësin e tij, Edi Rama për emërimin në krye të Federatës së Mundjes, ish-deputetin Arben Ndoka. Ndër të tjera ai shtoi se edhe në krye të Bashkisë së Dibrës do vendoset sipas tij i forti Imer Lala.
Në kundëpërgjigje, kryeministri Rama tha se kundërshtarët e reformës në drejtësi janë ata që kanë probleme me drejtësinë.
Berisha: Opozita ka luftuar shumë për standardet siç e keni parë ju dhe prapë është e vendosur të diskutojë. Këtu po prishet në mënyrë të verbër ai konsensus i sanksionuar në Kushtetutë. Si do t’i thyejmë me ligj këto? Ju a doni që të funksionojë reforma? Ne po themi t’u përmbahemi amendamenteve. Ka një ndërgjegje dhe mos mendoni ju se jeni thyer. Jeni thyer nga ato qeveri, të cilat kreu juaj u thoshte se i kemi me vete dhe pas dy orësh merrte kartonin e kuq. Mos të bëjmë gjëra qesharake. Kemi rënë dakord dhe i kemi sanksionuar në Kushtetutë dhe hajde t’i përmbahemi Kushtetutës. Është e vërtetë që ka probleme edhe defekte materiale dhe të tjera, por është në detyrimin tonë t’i korrigjojmë dhe t’i përmirësojmë.
Të bëjmë gjithçka që reforma të ketë me sukses. Në qoftë se votuam me ndërgjegje që ky sistem duhet reformuar, hajde ta reformojmë. Hajde t’i përmbahemi parimeve. Pse u dashka bërë kjo? A nuk jeni ju që nxorët atë zonjën t’i thotë Kolegjit Elektoral se do ta shohësh me vettingun? Për gjah shtrigash e përdorni Vettingun ju? S’do do ta bëni dot kurrë! Do thyeni qafën! Do bllokoni reformën. Jo 1 t’u thotë, por 100 t’u thonë. E provuat dy vjet rresht se si u thyet nen pas neni, pasi pikërisht donit të bënit këto që s’i bëtë dot me Kushtetutë, doni t’i bëni tani. Të organizoni gjahun e shtrigave. Në demokraci nuk ka gjah shtrigash, ka dinjitet njerëzor. Nuk të lejon ai të bësh gjahun e shtrigave. Ai të lejon të bësh vlerësime objektive. Të lejon të rrisësh performancën. Hajde urdhëro! Ne e bëmë Kushtetutën e drejtësisë. E bëmë me qëllimin më të mirë.
Rama: Spastrimin e pallatit të drejtësisë nga të gjithë ata të cilët e kanë marrë peng drejtësinë në këtë vend, kanë marrë liri dhe të drejta në çdo nivel, e kanë kthyer drejtësinë në një mall që shitet e blihet dhe kanë penguar jo vetëm çdo qytetar në rrugën e vetë për të marrë të drejtën por një popull të tërë për tu qeverisur nga ata që nuk kanë probleme me drejtësinë.Ata që i kundërvihen reformës në drejtësi, janë ata që kanë probleme me drejtësinë.
Ata që bëjnë çmos për të penguar proçesin e pandalshëm të kësaj reforme, janë ata që me të drejtë ndjejnë çfarë vjen pas nga kjo reformë. Ata të cilët u detyruan ti bashkohen konsensusit në këtë sallë për arsye se presioni popullor dhe i partnerëve dhe miqve tanë ndërkombëtarë ishte kolosal dhe faktikisht muri i 94 votave u shemb mu përpara derës së SHQUP-it. Habitem pse nuk festojnë me ne një fitore tjetër, ne jemi gati të festojmë njësoj si atë natë.
Kur shumë sinqerisht i urova PD-së sa më shumë fitore si ajo e asaj nate, nuk e kuptoj pse po ndahet nga treni i fitores. Jam i bindur se këtë e kupton çdo shqiptar që arsyeton pak. Këtu ka vetëm një gjë për të bërë, të votojmë një ligj kaq të rëndësishëm. I bëmë të gjitha përpjekjet për të bërë konsensus, por nuk mund të ketë konsensus allashqiptarçe që i bie ndesh konsensusit me partnerët tanë ndërkombëtarë në rrugën e integrimit të BE. Integrimi në BE nuk është një menu ku merr atë që të pëlqen dhe refuzon atë ndaj të cilës je alergjik, është menu që o merret e gjitha ose nuk ka asnjë vlerë të marrësh çfarë të pëlqen dhe të lësh çfarë nuk të pëlqen.
Në këtë proçes nuk jemi sovran për të zgjedhur çfarë na pëlqen nga rregullat dhe normat e familjes së bashkuar europiane. Jemi të detyruar ndaj vullnetit të popullit sovran për t’iu nënshtruar ndaj të gjitha rregullave dhe normave që do na mundësojnë të bëjmë shtet.Ta votojmë këtë ligj si shumicë duke vazhduar me koherencë të mbrojmë themelet e programit tonë qeverisës, të mbrojmë zotimet tona para shqiptarëve. Jemi i pari koalicion qeverisës që nga 1992 që e kemi shkruar në program reformën në drejtësi.
Berisha: Ke dy vite rresht që ka dalë këtu me letër dhe ke thënë Shtetet e Bashkuara dhe Bashkimi Evropian se pikërisht ato që përmendi ky i nxorën kartonin e kuq dhe ka raste dy herë në ditë. Tani s’ka më nevojë.
Tani urdhëroni t’i japim mundësi zbatimit të ligjeve. Ne nuk kemi hallin se ti do ta kapësh se absolutisht t’i je kryeministri më i përkohshëm në historinë e këtij vendi. Ne nuk duam që edhe ai kryeministri që vjen qoftë edhe i yni, të mos mund të ketë mundësi për të kapur drejtësinë. T’i ke hallin e madh të Surrelit dhe në thes nuk e fut dot. E ka thënë populli: “Minareja nuk futet në thes!” Pallati nuk futet në pajë.
