Kryetari i Partisë Demokratike, Sali Berisha ka lënë sallën e Kuvendit dhe ka folur për mediat, ku thotë se në Parlament po votohet në shkelje flagrante të kushtetutës.
“Sot në parlamentin e Shqipërisë po kryhet një dhunim i shëmtuar i kushtetutës, një akt antikushtetues, votohet në shkelje flagrante të kushtetutës, për President Republike njeriu që kalon nga karrigia e shefit te Shtabit në karrigen e Kreut të Shtetit duke shkelur hapur nenin 167 të kushtetutës, sipas të cilit, ushtaraku aktiv nuk mund të emërohet, dhe as zgjidhet në organe apo pushtete të tjera veç detyrave të ushtrisë. Kandidati që votohet sot, nis udhën e tij duke shkelmuar me dy këmbët kushtetutën pasi kandidon për president si shef i shtabit të përgjithshëm i ushtrisë shqiptare. Pretendimi se dha dorëheqjen ka 0 vlerë sepse për ushtaraku jo dorëheqja, por miratimi dhe largimi i tij nga detyra, është rruga e çliron nga detyra”, deklaron Berisha.
Sapo ka nisur procesi i votimit në seancën plenare për zgjedhjet e Presidentit të ri, ku kandidat është Bajram Begaj, i propozuar ditën e djeshme nga Partia Socialiste.
