Sekretari i PD, Gazment Bardhi, ka reaguar në lidhje me akuzat se anëtar e PD që ndodheshin brenda në seli kanë përdorur armë të ftohta dhe lëndë plasëse ndaj protestuesve. Në një deklaratë për mediet, Bardhi u shpreh se në ambientet e selisë së PD nuk është përdorur asnjë armë.
Ai theksoi se, janë përdorur vetëm fikëse zjarri për t’u mbrojtur nga gurët apo tullat që hidheshin nga jashtë nga protestuesit. “Nuk ka rezultuar asnjë send i ndalur ndaj asnjë personi. Në momentin që konstatohen sende të ndaluar personi arrestohet në flagrancë. Nuk ka pasur as lëndë plasëse. Në të gjitha ambientet e selisë ka fikëse zjarri. ka pasur vetëm fikse zjarri që mund të duken se bëjnë tym. Nëse do të kishte gaz do të ishin gjetur provat nga policia nuk besoj se ato hahen.
Dikujt që i fluturon tulla apo guri mbi tavolinë e tij të punës është në të drejtën e tij për ta trembur duke përdorur fikse zjarri. Cilido që ka qenë në mbledhje dhe ka tentuar të shkojë tek fëmijët e tij pas një dite terrori të organizuar nga Berisha shoqërohet nga Policia pa asnjë shpjegim. Mos u përqendroni tek shkopinjtë siç u përqendruat tek dyert ndërkohë që Berisha orkestroi akte dhune”, tha më tej ai.
Në protestën e sotme janë hedhur gurë dhe sende të forta dhe madje gaz lotsjellës, por të dyja palët nuk e pranojnë këtë, ato i hedhin fajin njëra-tjetrës dhe Policisë së Shtetit.
