Beqir Ali Plaku është një person tjetër që është raportuar në Bazën e të dhënave të ICMP-së si i humbur i komunizmit.
Ai ka një histori të veçantë, e cila rrëfehet nga e bija.
“Arrestimi u bë në mëngjezin e ditës 3 korrik të vitit 1960. Atë ditë u arrestuan edhe dy xhaxhallarët e tjerë, xha Mero Plaku në Tiranë dhe xha Mushir Plaku në Kavajë. Atë ditë u arrestuan 300 veta në gjithë Shqipërinë e të gjithë çamë. U quajtën grupi i Teme Sejkos, të cilët akuzoheshin për tradhëti e bashkëpunim me rusin, por babai, xha Mero, xha Mushiri, kishin dosje në vete e nuk ishin me grupin e Temes. Famijarët tonë akuzoheshin që kishin pritur vëllain e tyre, Rushitin si agjent i CIA-s e nuk e kishin dorëzuar. Në atë periudhë arrestuan edhe nanën, Mine Plaku. E mbajtën një muaj në hetuesi me presione e hetime që të nxirrnin ndonjë gjë prej saj, apo ta detyronin që ajo të aprovonte shpifjet e tyre. Mbas një viti u bë gjyqi me dyer të mbyllura dhe babai u dënua me pushkatim, Mero me 12 vjet, Mushiri 8 vjet. Eshtrat e babait nuk u gjendën kurrë.”
* Marrë nga faqja në facebook të Në kërkim të të zhdukurve të Shqipërisë
