Ministri i Shëndetësisë, Ilir Beqaj ka konfirmuar se kompania e cila do të marrë me koncesion shërbimin laboratorik publik në 18 spitale të vendit, do të ketë në dorëzim edhe trupën e profesionistëve.
Beqaj pranoi se duke nisur prej 1 janarit, shërbimi laboratorik në 18 spitale të vendit do të jepet me koncesion dhe se operatorit, krahas pajisjeve, do t’i besohen edhe burimet njerëzore.
Në këto 18 spitale janë rreth 420 veta që janë të punësuar për të ofruar këtë shërbim, nga të cilët 80 veta janë mjekë dhe kimistë. Këta të fundit do të vazhdojnë të jenë të punësuar pranë spitaleve publike, ndërsa personi tjetër do të jetë i punësuar pranë atij operatori që mund të dalë fitues nga tenderi”, tha Beqaj.
Mosbërja publike e studimit të fizibilitetit, të cilësuar si një dokument konfidencial nga ministri Beqaj, solli reagimin e kryetares së Komisionit të Shëndetësisë, Albana Vokshi, dhe deputetit të LSI-së, Petrit Vasili.
Sipas Vasilit, mbajtja fshehur e studimit lë vend për dyshime. Për deputetin e LSI-së, ky model koncesionimi që kërkohet të aplikohet nuk ekziston në asnjë prej vendeve të BE-së.
Vetëm për vitin 2017, ky koncesion do t’u kushtojë taksapaguesve 8 milionë dollarë.
