Ministrja e Infrastrukturës dhe Energjetikës, Belinda Balluku, ka kërcënuar me pasoja ligjore kontrollorët e shërbimit ajror, nëse nuk i rikthehen punës.
Në një konferencë për mediat nga Aeroporti i Rinasit, pas takimit me kontrollorët, ku nuk u arrit një marrëveshje, Balluku tha se pavarësisht negociatave, në tavolinë pati njerëz që në mënyrë të paprecedentë nuk pranonin zgjidhje.
Balluku ka shtuar se kjo është një fushatë politike, teksa ka hedhur akuza ndaj ish-kryeministrit Sali Berisha.
“Prej ditësh ka pasur interes politik. Kam ndjekur Sali Berishën që ka një lumturi shumë të madhe të thotë se si do mbyllet aeroporti i Rinasit. Se si do bllokohet gjithçka. Unë e kuptoj sepse e gjitha kjo është një organizim politik. Për shkak të fushatës dhe të gjitha skemave politike që po aplikohen Sot nuk do të vijnë dot vaksina kundër covid. Ishin planifikuar që të vinin sot pasdite për të vazhduar vaksinimin. Sot për shkak të kësaj fushate për të nxirë faqen e Shqipërisë për të prishur imazhin e vendit. Si zakonisht po ndodh edhe një tjetër se po afektohet e gjithë popullsia që nuk duhet të ndodh. Sot që është i sëmurë nuk mund të kthehet. Sepse kontrollorët janë të mërzitur se paga është 2490 dollar. Sepse nuk do Sali Berisha që edhe një herë ka përdorur një gjuhë të ashpër duke gëzuar në problemet që ky vend has. Cudi e madhe se si ushqehet.”, tha Balluku.
“Ka pasur negociata, janë ulur në tavolinë, kanë dëgjuar nga drejtori se kush ishte skenari për ta zgjidhur këtë ngërc financiar kaq të rëndësishëm për ta. Megjithatë, me gjithë këto negociata, me një mënyrë të paprecedentë, pashë njerëz sot në tavolinë që nuk pranonin zgjidhje. Është një situatë që futet në cënimin e sigurisë kombëtare dhe cenimin e të drejtës së lëvizjes së shqiptarëve. Do të ketë marrje masash nga ana e shtetit shqiptar, do të ketë dhe ndëshkim. Duhet të vazhdojnë punën, për të cilën janë paguar prej vitesh.
Fluturimet janë bllokuar, pasi është deklaruar paaftësi nga kontrollorët. Fluturimet në Aeroportin e Rinasit janë bllokuar, prej disa orësh. Kemi një plan për rihapjen, që po laborohet, por nuk do të bëhet publik, përveç datës dhe orës, kur do të rihapen. Sa iu përket pagave, të parët që janë prekur nga pandemia ka qenë administrata, pagat e të cilëve janë ulur deri në 80%, ashtu sic janë ulur edhe pagat e drejtorëve, më shumë se pagat e kontrollorëve”, shtoi ministrja.
