Çdokush që blen një biletë lotarie, herë pas here shpreson se edhe mund ta fitojë. Dhe zakonisht fituesit, pas milionave të “rëna nga qielli” ndërrojnë mënyrën e jetesës duke shijuar luksin dhe eksperiencat e reja.
Por Rachel Lapierre, nga Montreali i Kanadasë ka bërë atë që pakkush do të bënte me paratë. Ajo ka fituar lotarinë që i siguron 1.000 dollarë në javë për të gjithë jetën dhe ka vendosur t’i falë të gjitha këto para.
“Të kesh një makinë të re, një shtëpi të re, çdo gjë të re, është vërtet bukur. Por, nuk është kjo, ajo që të duhet në jetë për të qenë e lumtur. Kur lind njeriu nuk i ka të gjitha. Edhe kur ikën nuk merr asgjë më vete. Ti ikën vetëm me ato që ke bërë këtu, në tokë, gjatë jetës tënde. Ato janë gjërat që do të të shoqërojnë”, është shprehur ish-Miss Quebecu, e cila e ka provuar më parë shijen e pasurisë dhe të famës.
