Zv.Presidenti i BB në Shqipëri, takon Guvernatorin e BSH, Sejko
Zhvillimi i institucioneve financiare jobankare, të cilat po rrisin gradualisht peshën e tyre në sistemin financiar shqiptar është një sfidë që duhet patur në vëmendje. Kjo ka qenë njëra nga temat e diskutimit që Zëvendëspresidenti i Bankës Botërore për Evropën e Azinë, Cyrill Muller pati në takimin me Guvernatorin e Bankës së Shqipërisë, Gent Sejko.
Në takim është vlerësuar roli i këtyre institucioneve në diversifikimin dhe zhvillimin e tregut financiar në Shqipëri dhe është theksuar se Banka e Shqipërisë ka pasur në fokus të punës së saj forcimin e vazhdueshëm të kapaciteteve të tyre në drejtim të qeverisjes dhe kontrollit të brendshëm.
Vitin e kaluar dhjetëra skema me leje dhe pa leje nisën të grumbullojnë kursimet e shqiptarëve për t’i investuar në bursat jashtë vendit. Në një kohë që licensë për këtë aktivitet kishin vetëm tri kompani, dhjetëra të tjera e kryenin këtë shërbim pa asnjë autorizim të autoriteteve shqiptare.
Banka Botërore dha para dy vitesh një hua prej 100 milionë dollarë për forcimin e sistemit rregullator financiar dhe regjimin mbikëqyrës. Kjo mbështetja ishte e detajuar në tre fusha njëra nga të cilat është edhe forcimi i aspektit rregullator dhe mbikëqyrës për institucionet financiare jobankare.
Drejtuesi i lartë i Bankës Botërore është në vendin tonë për një vizitë dyditore në të cilën planifikon të realizojë takime me drejtuesit e lartë të shtetit shqiptar.
