Trajneri i Bajernit, Jup Hejnkes, u prit në dhomën e gazetarëve nga Graham Hunter i Sevijës. 72-vjeçari ka njohje të vjetra me gazetarin që nga koha kur drejtonte Las Palmasin në Spanjë. Jup ishte shumë i qetë në konferencën para ndeshjes së sotme ndaj Sevijës.
Pajtoheni me një 0-0?
Absolutisht, jo. Bajerni do të luajë për fitore. Nuk do të futemi në lojë duke menduar për një rezultat të caktuar. Të gjithë e pamë çfarë ndodhi me Mançester Junatid, pasi barazuan këtu 0- 0. Asgjë nuk është e sigurt me atë lloj rezultati.
Si e prisni ndeshjen e sotme?
Bajerni ka luajtur shumë ndeshje të këtij niveli me ekipe të mëdha dhe me tifozëri të zjarrtë. Lojtarët e mi nuk do të tremben nga atmosfera që do të krijojnë tifozët e Sevijës në ndeshjen e sotme. Në aspektin personal pres një ndeshje si ajo ndaj Liverpulit, kur isha me Gladbahun. Atmosfera aty ishte shumë e zjarrtë. Kështu e pres dhe sot në Sevijë, një atmosferë spektakolare.
Si i kujtoni përballjet ndaj klubeve spanjolle?
Në vitin 2012, Bajerni shkoi në Madrid dhe eliminoi Realin. Në sezonin pasardhës, ne eliminuam Barcelonën, me gjithë respektin që kam për katalanasit që luajnë një futboll spektakolar. Fituam ndeshjen e parë 4-0 në shtëpi dhe 3-0 në Barcelonë. Kjo tregon që çdo sezon është ndryshe nga tjetri.
Si është gjendja e Hamesit?
Kur erdha në tetor, gjendja fizike e mesfushorit nuk ishte optimale, një faktor që është shumë i rëndësishëm për lojtarët. Fola me të dhe tani ai është në një gjendje shumë të mirë. Ka shumë besim te vetja dhe është i karikuar. Ai është një futbollist i madh. Dhe sipas logjikës, ai duhet të qëndrojë te Bajerni edhe në sezonin tjetër.
Po Arturo Vidal?
Vidal është një lojtar shumë i rëndësishëm për ne. Ai është stërvitur rregullisht me ekipin ditën e diel dhe mendoj ta grumbulloj për ndeshjen e sotme. Duket se dëmtimi i pësuar me Kilin i përket së shkuarës. Shpresoj shumë ta kem të gatshëm qoftë edhe për disa minuta të vetme. Por nuk dua të rrezikoj.
