“Presidenti një kryelodër në duart e njërit prej biznesmenëve të familjes”
Bashkia e Tiranës reagoi pas deklaratave të Presidentit Bujar Nishani që kërkonte hetim të Prokurorisë për kryebashkiakun Erion Veliaj. Sipas Bashkisë, Nishani tregoi se e ka humbur legjitimitetin si përfaqësues i unitetit të popullit shqiptar.
Ja deklarata e plotë e Bashkisë të Tiranës:
Bashkia e Tiranës vëren me keqardhje se, prapë sot, Bujar Nishani nuk bëri asgjë tjetër veçse konfirmoi edhe një herë, për çudinë e askujt, se është një kryelodër në duart e njërit prej biznesmenëve të familjes, duke humbur kështu legjitimitetin e të qenit përfaqësues i unitetit të popullit shqiptar!
A e dëgjuat Presidentin e lodrave që, përmes të gjitha atyre që tha, pranoi se është thjesht një lodër në duart e interesave të zymta që mbajnë peng Reformën në Drejtësi dhe vetë këtë çështje publike, ku qartësisht drejtësia e molepsur me biznesin ka nxjerrë surratin e saj?!
Si mund të shqetësohet Presidenti për një grup njerëzish që protestojnë ndaj lodrave dhe t’u bashkohet atyre duke ngjitur kodrën e duke sulmuar lodrat, pa u shqetesuar fare për një grup gjykatësish që e kanë bërë lodër në dyert e tyre interesin publik?!
Si mund të dalë Presidenti hapur kundër një parku lojërash për fëmijë në emër të luftës kundër betonit dhe nga ana tjetër mbështet po kaq hapur një lojë të shpifur korrupsioni, në një gjykatë që vendos a do kemi park për fëmijët apo një mal të rrezikshëm betoni ngjitur me Digën e Liqenit?!
Si mundet kreu i Sigurisë Kombëtare, që është kaq i vëmendshëm ndaj fjalëve sepse i prekërkan kostumin institucional, të cilin në fakt nuk e veshi dot kurrë, dhe të mos e çajë kokën fare të thotë një fjalë për raportin e Komitetit Kombëtar të Digave, i cili e thotë qartë se ky mal betoni që duan të ndërtojnë me ngulm Saliu, Luli, Bujari dhe soji e sorrollopi i tyre, kërcënon sigurinë e digës?!
Kujt duan t’ia tregojnë këta baronë provincialë pavarësinë e gjykatave dhe se nuk u bëka protestë në duart e gjykatave nga Kryetari i Bashkisë apo qytetarët?!
Këto pallavra nuk mund t’i hanë shqiptarët që kanë parë me qindra e mijëra raste protestash të guvernatorëve e kryebashkiakëve amerikanë në sheshet e Gjykatave të Amerikës, nga Gjykata Kushtetuese e SHBA te Gjykatat e Shteteve të atij vendi, apo protestat e kryebashkiakëve në qytete europiane, përballë gjykatash shumë serioze, e jo përballë çetash që as nuk e fshehin se kanë qëllim të shkelin ligjin!
Çdo ditë e më shumë bëhet e qartë si janë ndarë kampet në vend. Në njërin krah, ata që hiqen se kanë hallin e pemëve të liqenit, por mbrojnë aktivisht betonin e 17 katëshit, dhe në anën tjetër qytetarët që duan një qytet të jetueshëm, të drejtë, me parqe e kënde lojrash e ata që punojnë për ta bërë këtë realitet të mundshëm.
Nesër Kryetari i Bashkisë së Tiranës do t’i drejtohet qytetarëve për shpalljen e hapur të aleancës mes presidentit dhe korrupsionit në çështjen e malit të betonit, që gjykata kërkon ta legjitimojë duke shkelur ligjin.
