Rikualifikimi urban në njësinë 7 në kryeqytet është drejt përfundimit. Kjo falë bashkisë së Tiranës e cila ka bërë të mundur që 5 mijë banorët që jetojnë në pjesën fundore të ish-Fushës së Aviacionit të kenë në dispozicion shumë shpejt një infrastrukturë moderne.
Për të inspektuar nga afër punimet, ishte kryetari i bashkisë Erion Veliaj, i cili theksoi se pas urbanizimit, në këtë zonë do të vendoset edhe linja e re e autobusëve
Veliaj: Dy javë para se të mbushet viti nga marrja e detyrës, kemi zhbllokuar një projekt që zvarritej pafundësisht. Sot jemi në një fazë ku, një pjesë e madhe e punimeve kanë mbaruar. Besoj se para afatit 10-mujor të punimeve, pra në krye të 5 muajve, do të kemi mbaruar urbanizimin e zones. Pas urbanizimit të zonës në këto 18 rrugë, do të fillojë edhe linja e re autobusëve, që të sigurohemi që jo vetëm asfaltojmë, por edhe shtojmë transportin.
Veliaj kërkoi bashkëpunimin e qytetarëve për të krijuar hapësirat e nevojshme publike brenda zonave të banuara, ndërkohë që vlerësoi vendimin e qeverisë për të legalizuar ndërtimet pa leje
Veliaj: Shumë mirë që kjo qeveri i ka legalizuar ndërtesat pa leje, por tani është e rëndësishme që me të njëjtën monedhë, qytetarët që sapo kanë legalizuar ndërtesat e tyre, t’i përgjigjen bujarisht qytetit duke lejuar që të kemi së paku 1-2 metër trotuare në funksion të hapësirës së përbashkët. Kështu, përfitojmë të gjithë, sidomos ata që për hir të trotuarit u del prona në pah dhe kanë një hapësirë më të këndshme përpara shtëpisë së tyre.
Ky bllok banimi shtrihet midis rrugës së Durrësit, Unazës së Madhe të Tiranës, Lumit të Lanës dhe parkut tek ish-Fusha e Aviacionit .Ndërhyrjet po realizohen në 18 akse rrugore, ndërsa për zgjerimin e rrugëve në bashkëpunim me banorët janë prishur rreth 85% e mureve
