Diktatori Bashar Al Assad është në zi, por jo për 260 mijë viktimat e shkaktuara deri më tani në konfliktin sirian.
Nëna e presidentit sirian, Bashar Al Assad, Anisa Makhlouf, ka ndëruar jetë në moshën 86 vjeç. Sipas njerëzve pranë familjes Assad, ajo ishte e sëmurë prej disa vitesh dhe kurohej në Gjermani, derisa në 2012 figuroi në listën e zezë të Bashkimit Europian me anëtarët e tjerë të rregjimit sirian të akuzuar për mbështetjen e represionit ndaj revoltës kundër tij.
Gjatë 30 viteve që i shoqi drejtoi vendin me dorë të hekurt, ajo ka qenë e tërhequr dhe rrallë ka dalë para mediave. Anisa Makhlouf ishte martuar në 1957 me atë që do të bëhej në 1970 padroni absolut i Sirisë. Ndërsa i shoqi kishte lindur në një familje të varfër, mësuesja Anisa Makhlouf i përkiste një mjedisi të pasur. Nëse Hafez Al-Assad kishte aderuar që shumë i ri në partinë Baas, që mbështeste bashkimin e botës arabe, familja Makhlouf ishte simpatizante e Partisë së Bashkimit Kombëtar Social Sirian, e cila ishte pro Sirisë së Madhe që përfshinte Libanin, Sirinë, Palestinën dhe Irakun. Çifti pati pesë fëmijë Baselin dhe Maxhidin që kanë vdekur, Basharin, presidentin aktual të Sirisë, Mahirin si dhe një vajzë, Bushrën. Meqenëse vendi është i zhytur që prej 5 vitesh në luftë civile, {residenca ka hequr dorë nga organizimi i ceremonive të ngushëllimit.
Lufta civile në Siri ka shkaktuar më shumë se 260 mijë të vdekur si dhe ka hedhur në rrugë më shumë gjysmën e popullsisë. Konflikti përfshin shumë grupe të armatosura, si dhe ka përfshirë dhe fuqi të huaja në një territor gjithmonë e më shumë të copëtuar. Me mbështetjen e fortë të ushtrisë ruse, rregjimi i Assadit së fundmi ka rregjistruar avancime të shumta ndaj rebelëve. OKB-ja shpreson të arrijë të bashkojë përfaqësuesit e pushtetit dhe ato të opozitës me 25 shkurt në Gjenevë për të tentuar për t’u angazhuar në bisedimet e paqes.
