Kreu i PD: Shteti antiligjor nuk do të na ndalë
Kreu i opozitës Lulzim Basha ka kërkuar nga Prokuroria të vërë para drejtësisë ata që ai i quajti “xhelatët që përlyen uniformën e shtetit duke dhunuar protestuesit”. Basha foli për qytetarët pas takimit me drejtues të Policisë së Tiranës, ku mbahen të ndaluar disa protestues. “Sapo kam takuar dhe biseduar me miqtë dhe vëllezërit tanë, përfshirë dhe kryetarin e degës numër 5, Çim Babasin. Kam kërkuar nga autoritetet e Prokurorisë të vendosin dhe rivendosin ligjin, të vendosin para përgjegjësisë ligjore xhelatët, njerëzit që përlyen uniformën e shtetit , të cilët përlyen uniformen e ligjit duke vepruar si banditë.Do luftojmë deri në përmbushjen e këtij kushti të drejtë. Kush mendon se me frikë, dhunë, terror do ta ndalë një popull të luftojë për vlerat e vërteta, shqiptarët e kanë provuar dhe do ta provojnë përsëri, dita e madhe e pranverës së demokracisë po afron, nuk e ndalon dot Edi Rama, nuk e ndalon dot krimi as oligarkia” ka deklaruar Basha. Sipas kreut të opozitës “Sot u provua se regjimi i Edi Ramës është një regjim antikushtetues dhe antiligjor, regjim i krimit dhe i dhunës. Krimi dhe regjimi oligarkik është përballë nesh”. Për Bashën regjim i ka orët e numëruara.
