Në ditën e 4 pas tërmetit të fuqishëm që godit vendin, kryetari i PD-së Lulzim Basha ka takuar nga afër banorë të Shijakut të prekur nga fenomeni shkatërrues.
Përmes një postimi në Facebook, Basha thekson se shumë qytetarë në këtë qytet po flenë nëpër makina dhe të afërmit e tyre. Basha tha se këta banorë kanë nevojë për ndihma materiale, ushqime, dyshekë dhe batanije.
“Sapo pashë nga afër situatën në Shijak ku qindra banesa janë të pabanueshme sidomos në zonën e “Luginës”. Shumë qytetarë flenë nëpër makina, dhe një pjesë tek të afërmit.
Banorët kërkojnë vëmendje më të madhe. Ata më thanë se përveç ditës së parë, nuk ka patur asnjë kontakt më nga autoritetet. Nuk kanë asnjë ide çfarë do të bëhet me ta.
Sot është nata e katërt që nuk futen dot në banesa. Kanë nevojë për ndihma materiale, ushqime, dyshekë dhe batanije. Banorët ankohen se ndihma e ofruar deri më tani është e pamjaftueshme. Përveç zonave të goditura rëndë si Durrësi dhe Thumana, duhet menjëherë tu vihet në ndihmë edhe zonave të tjera ku njerëzit janë në vështirësi të mëdha dhe ndihen të braktisur.”, shkruan Basha.
