Kryetari i PD, Lulzim Basha, ka nisur takimin me 300 studentë europianë të organizatës studentore të Partisë Popullore Europiane.
Në fjalën e tij, kreu i PD Lulzim Basha tha se miqtë tanë duhet ta dinë se ndodhen sot në një vend që nuk ka Gjykatë Kushtetuese.
“Ndaj beteja që kemi nisur nuk është betejë për pushtet, është betejë për Evropën. Në Evropë shkohet vetëm me zgjedhje të lira dhe të ndershëm. Vetëm zgjedhjet e lira dhe të ndershme garantojnë ndarjen dhe balancimin e pushteteve. PDSH që ka lindur nga studentët, nga rinia shqiptare qëndron për një standard demokracie, demokracinë evropiane dhe respektimin dhe liritë e të drejtave të njeriut. Në këtë betejë kemi përballë një kupolë të rrezikshme politikanësh të lidhur me krimin. Pasi kanë zaptuar PS kanë shkatërruar debatin politik në vend. Protesta jonë, lëvizja jonë bëhet për të kthyer themelet e bashkëjetesës demokratike, për të kthyer zgjedhjet e lira demokratike. Kjo është beteja që do ta fitojmë me çdo kusht. Për këtë do dalim nesër. Kjo është një betejë kombëtare, por edhe një betejë evropiane. Po luftojmë për Evropën në Shqipëri. Negociatat e anëtarësimit me BE nuk hapen. Një vend që nuk respekton kriteret minimale nuk mund të pranohet në bashkimin e vlerave. Shteti i së drejtës është i rëndësishëm, është parakushti pa të cilin nuk ka demokraci, as ekonomi, as shanse për punësim”.
