Pas kryeministrit Edi Rama, edhe kreu i PD Lulzim Basha është larguar nga seanca parlamentare e ditës së sotme.
Basha pati një debat me zv/kryeministrin Arben Ahmetaj dhe kërkoi uljen e TVSH nga 20% në 6% për produktet e shportës.
Ahmetaj replikoi me të disa herë, ndërsa deputetët e tjerë socialist i kërkuan Nikollës t’i presë fjalën Bashës pasi sot ka folur më shumë se pjesa tjetër.
Replikat
Ahmetaj: Fondi monetar thotë ruajtëm jetë për shkak të politikave që ndoqëm. Ja ku e kemi se jemi në krye, Falë zotit dhe falë punës së mjekëve. Na keni thënë bëhuni seriozë me politikat fiskale. Mos harroni që e latë biznesin e vogël me 10% taksë. Është zero sot. 15 mijë familjet e ndihmës ekonomike do marrin 2-fish dhe 3-fish. 283 mijë i marrin sot librat falas. Mos dëgjo njerëz që kanë nxjerrë kriminelë nga burgu.
Basha: Ministri doli këtu dhe përmendi emrin e një deputeti. Rregullorja është e qartë. Nuk përmenda fare asnjë emër. Dopio standardin e hani bashkë me turpin. A doli ai këtu për procedurë, a foli për procedurë. Jo. Dijeni vendin tuaj.
Çiraku është çirak. Ustai është usta. Mos merr rolin e ustait. Rri në rolin e çirakut. Ustai që do ta heqë fjalën nga hallet e shqiptarëve ia mbathi. Çiraku t’i mëshojë. Ulja e TVSH nga 20 në 6% është për shqiptarët. Ne nuk jemi këtu për ju. Nuk na ka marrë malli për ju. Jemi për një interes përtej interesit të PD. Jepni shqiptarëve atë që është e shqiptarëve. Ulni TVSh nga 20 në 6%.
