Kryetari i Opozitës së Bashkuar Lulzim Basha po zhvillon në këto momente një takim me qytetarë dhe demokratë të Kamzës.
Kreu demokrat është pritur nga qindra automjete me flamujt të Partisë Demokratike të cilët kanë dalë ta presin Bashë që në rrugën kombëtare duke e përcjellë në një atmosferë të jashtëzakonshme.
“Për pak minuta në tamimin me aktivin e PD-së në Kamzë. Siç shikohet dhe njëherë pritja e jashtëzakonshme para takimit. Bllokohen rrugët, Pas pak minutash më ndiqni nga Kamza”, u drejtihet Basha qytetarëve në një video livestrime.
Gjatë fjalës së tij Basha deklaroi se dy gishtat janë simbol i demokratëve të Shqipërisë, por jo vetëm. Basha tha se dy gishtat janë simbol i demokratëve, por edhe i mbarë shqiptarëve.
“Dy gishtat nuk janë simbol vetëm i demokratëve, por i mbarë shqiptarëve. Kjo sepse gjithë shqiptarët janë me kauzën tonë, të lirisë dhe demokracisë e jo të krimit në pushtet. Nga Kamza, nga Paskuqani shpërndahet përditë mesazhi se liria dhe demokracia janë në themel të bërjes së Shqipërisë një vend më të mirë dhe të begatë.
Së bashku do ia kthejmë Shqipërisë dinjitetin e humbur në këto 6 vjet. Të ndalim të keqen, të ndalim makthin e përditshëm dhe të përnatshëm të organizatës kriminale të Rilindjes. Orët e shtypjes, arrogancës, padrejtësisë, nuk mund të zgjasin më. Shqipëria e ardhshme është ajo me ngjyrat blu, përzier me ngjyrat e flamurit tonë kombëtar, kuq e zi”, tha Basha.
