Pas takimit me kryeparlamentarin Meta, kreu i PD-së, Lulzim Basha deklaron se janë bërë hapa mbrapa nga marrëveshja e arritur dje në takimin trepalësh. Basha fajëson kryeministrin Rama se ka prishur marrëveshjen.
“Kjo është një përpjekje ogurzezë për të shkatërruar konsensusin. Rama e shpalli në pallatin e Brigadave për të mos lejuar PD të bashkojë votat në një proces konsensual. Faleminderit kryeparlamentarit për konsensusin, dolën petët e lakrorit kush e do konsensusin dhe kush do ta sabotojë atë”.
Më tej kryedemokrati theksoi se bashkë me Metën është i gatshëm t’i drejtohet Brukselit për të shpartalluar, atë që ai e quajti, komplot të kryeministrit ndaj reformës në drejtësi. “PD ka vototat gati për të votuar në parim draftin dhe pas rakordimit në parim. 2 çështjet e rikthyera në tryezë nëse nuk zgjidhen dot, do ta zgjidhim në Bruksel bashkë me Metën për të shpartalluar komplotin e Edi Ramës”
Reforma në Drejtësi, Meta takim me Bashën në hotel “Rogner”
Kryetari i Kuvendit Ilir Meta është takuar sot me kreun e PD, Lulzim Basha. Takimi është zhvilluar ne ambientet e hotel “Rogner” dhe mendohet se po diskutojnë për reformën në drejtësi.
Kryeopozitari Basha është i shoqëruar nga kreu i grupit parlamentar, Edi Paloka. Ndërsa Meta nga Ylli Manjai, Petrit Vasili dhe Sokol Dervishaj.
Ndërkoha Basha në orën 18:00 do të mbledhë grupin parlamentar për qëndrimin në lidhje me reformën.
Ky është takimi i dytë, brenda 24 orëve mes Bashës dhe Metës, pas atij zyrtar të zhvilluar një ditë më parë në selinë e Kryesisë së Kuvendit mes Bashës-Ramës-Metës.
Një ditë më para Basha tha se Rama nuk i ka 94 vota për miratimin e reformës, duke i quajtur deklaratat e tij presion ndaj opozitës.
