“Shqiptarëve pa dallime politike duan të largojnë Edi Rama një orë e më parë nga pushteti”
Zgjedhje të lira, ulje e moshës së pensionit, rritje e pagës minimale, ulje e çmimit të energjisë elektrike, subvencionim për energjinë elektrike deri në 200 KË, subvencionim i faturës së ujit për familjet me ndihmë ekonomike, subvencione për bujqësinë, anulimi i koncesioneve korruptive në shëndetësi dhe kthimi i 1 miliard eurove në ekonomi me ulje taksash, ky përbën thelbin e paltformës së PD dhe premtimeve të Lulzim Bashës për qytetarët. Pikërisht këtë paltformë Kryetari i Partisë Demokratike, e ka prezantuar në Gjirokastër, Lazarat e Lunxhëri.
Për zgjedhjet e lira Basha tha se Partia Demokratike ka hartuar një platformë mbështetur mbi parime europiane, e cila mundëson që vota e shqiptarëve të mos preket, që shqiptarët të votojnë të lirë.
Në takimin në Lazarat, Basha duke iu referuar situatës së rëndë ekonomike, papunësisë, taksave të larta, arrogancës së pushtetit, korrupsionit qeveritar dhe lidhjeve të saj me krimin, theksoi se sot shumica dërrmuese e shqiptarëve pa dallime politike besojnë se Shqipëria do të jetë më mirë pa Edi Ramen dhe duan largimin e tij një orë e më parë nga pushteti. Basha tha “Banda e Edi Ramës është e rrethuar nga një Shqipëri në mjerim sepse mjerim mbollën me taksat e larta, me terrorin, me kërbaçin. Banda e Edi Ramës është e rrethuar nga një popullsi e dëshpëruar sepse dëshpërim mbollën me mbylljen e vendeve të punës, me çmimet e larta dhe faturat aforfe të energjisë elektrike, me taksat e larta. Shumica dërrmuese e shqiptarëve pa dallime politike duan që Edi Rama të largohet një orë e më parë nga pushteti”.
Basha ka paraqitur edhe pjesë të platformës për bujqësinë në të cilën premtohet buxheti më i madh për këtë sektor ku nga 150 milionë euro, 50 milionë euro do të shkojnë për infrastrukturën bujqësore dhe 100 milionë euro për subvencione direkte për fermerët.
