Drejtuesi Politik i PD për Elbasanit, Gazment Bardhi ditën e sotme është takuar me banorë të fshatit Floq të Cerrikut, të cilët treguan vështirësitë dhe mungesën e mbështetjes nga qeveria.
Zona njihet për prodhimin e rakisë mjaft cilësore, një traditë 30 vjeçare tashmë.
Por banorët thonë se nuk e shesin dot dhe nuk e përballojnë konkurrencën me fqinjët, pasi kostot janë shumë të larta duke shtuar se nuk ka infrastrukturë dhe pikë shitje.
Bardhi bëri me dije se PD ka prioritet që 4 vitet e para fshati nëpërmjet programit të realizuar do të dalë nga mjerimi.
“Jam i bindur që Kryetari i Bashkisë nuk ka ardhur ndonjëherë këtu. S’duhet të diskutonim sot për rrugë. Duhej të ishin bërë rrugët, dhe subvencionimi do të duhej të funksiononte vetë. Ne kemi një plan, një zgjidhje konkrete, që secili do të marrë për aq sa prodhon, pa shkresa e letra, vetëm me kartën e identitetit. Ne e kemi prioritet të 4 viteve të para nxjerrjen e fshatit nga mjerimi. Nuk ka arsye që dikush që banon në fshat të jetë i varfër. Nëse ju do të keni rrugë, kanale vaditëse, dhe subvencione mbi bazën e prodhimit, ju nuk ja keni nevojën askujt”, u shpreh Bardhi.
