Presidenti i Shteteve të Bashkuara të Amerikës, Barack Obama, referuar ngjarjes së sotme në Orlando është shprehur se bëhej fjalë “për një akt terrori dhe urrejtjeje”.
Ngjarja ka ndodhur mëngjesin e sotëm në lokalin “Pulse”, një klab homoseksualësh, ku kanë mbetur të vrarë 50 persona dhe janë plagosur 53 të tjerëve. Zyrtarët kanë identifikuar njeriun përgjegjës për ngjarjen e rëndë. Ai është Omar Saddiqui Mateen, një 29-vjeçar nga Afganistani, i cili u vra nga policia.
Obama ka vazhduar më tej – “Sot si amerikanë, ne dëshpërohemi për vrasjen brutale, një masakër të tmerrshme të dhjetra njerëzve të pafajshëm. Ne lutemi për familjet e tyre, që po përpiqen të gjejnë përgjigje me zemra të thyera. Ne qëndrojmë në krah të popullit të Orlandos që përjetoi një sulm të tmerrshëm në qytetin e tyre”.
Ai ka urdhëruar qeverinë federale që të ofrojë gjithçka të jetë e nevojshme për hetimin e ngjarjes.
Nga ana tjetër, Senatori i Floridës, Bill Nelson, tha se zyrtarë amerikan të zbulimit e kishin informuar se, autori mund të kishte premtuar besnikëri ndaj Shtetit Islamik. Ai shtoi se hetuesit, janë kryesisht të përqendruar në Fort Pierce dhe St.Lucie të Floridës, vende ku njoftohet se ka jetuar autori i sulmit.
Kryetari i Bashkisë së Orlandos, Buddy Dyer, gjatë një konference për shtyp u shpreh se sot po përballemi me diçka që kurrë se kemi imagjinuar.
