Tenderat e bashkive nxihen këto ditë nga asfalti elektoral i shoqëruar me abuzime me fondet. Juliana Memaj është një tjetër kryebashkiake që po hedh paratë për asfalt para zgjedhjeve. Tashmë është zyrtare që në 11 maj të viti 2025 do të mbahen zgjedhjet dhe vartësit e Ramës po shfrytëzojnë mirë këtë kohë. Por jo vetëm kaq, ata kujdesen që paratë të shkojnë në rrethin e ngushtë të biznesmenëve të favorizuar.
Në këtë kuadër kryebashkiakja e Dimalit ka vënë në lojë 166 milionë lekë në një projekt rural të domosdoshëm, por qëllimi vihet në dyshim po të shohim mënyrën si është realizuar procedura e tenderit.
Së fundmi, Bashkia Dimal ka zhvilluar tenderin me objekt “Rikonstruksioni i rrugës Hingë”.
Sipas të dhënave të relacionit që shoqëron tenderin do të rikonstruktohet rruga që shohim në foton më poshtë
Investimet që do të bëhen përfshijnë pastrimin e shkurreve në anësore, gërryerjen 15 cm të dheut për ta niveluar, 10 cm çakëll dhe mbushja me 5 cm asfalt. Nuk flitet për ndërtimin e trotuareve dhe as për ndriçim edhe pse është rruga kryesore e fshatit Hingë.
Për këto investime gjysmake banorët paguajnë nga taksat e tyre 166 milionë lekë, por dukshëm që paratë nuk do të shpenzohen të gjitha për punimet e rrugës.
Një pjesë e fondit humb për shkak të abuzimeve gjatë prokurimit.
Bashkimi Operatorëve Ekonomik TOTILA sh.p.k & “METEO”.SH.p.k ishin të vetmit që dorëzuan një ofertë me vlerë rreth 160 milionë lekë, sërish një shifër e lartë për një shtresë asfalti. Gjithsesi, pa e marrë në konsideratë ofertën e shtrenjtë, procedurat nuk duhej të kishin vazhduar sepse ka mungesë konkurrence.
Mema nuk i pezullon procedurat, sepse nuk mund t’i prish terezinë biznesmenit Eral Myftaraj, pronarit të firmës METEO i cili është mësuar të marrë pa garë tenderat nga bashkitë dhe ente të tjera publike. E nëse nuk i plotësojnë kërkesat Myftaraj ngre gjithë miqtë e Rilindjes në këmbë.
Open Data Albania e ka vlerësuar tenderin me “Flamur të kuq”, që është shenja e riskut të korrupsionit.
Nga ana tjetër, urojmë që kësaj here të bëhet kjo rrugë, sepse banorët mashtrohen gjithmonë para zgjedhjeve. Në vitin 2018, populli i këtij fshati protestonin sepse rruga u la përgjysmë.
Edhe politikani i opozitës, kryetari i PAA, Agron Duka vinte në dukje para disa ditëve se “Hinga, fshati i mandarinave vuan për shkak të infrastrukturës.
“Një tjetër sfidë për këtë fshat të prodhimit bujqësor është infrastruktura rrugore, që vështirëson transportin e mandarinave drejt tregjeve. Një vit pune mund të shkojë dëm nëse nuk gjenden zgjidhje për këto probleme jetike për bujqësinë shqiptare”, shkruan Agron Duka.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
