Vijon kundërshtia e banorëve për Unazën e Re. Banorët kanë kundërshtuar aksionin e policisë bashkiake për heqjen e ndriçimit publik.
Deputetë të opozitës ndodhen në mbështetje të banorëve. Të pyetur nga Ora News, banorë të kësaj zone thonë se askush nuk i ka pranuar banesat sociale dhe se ata që i kanë pranuar kanë pasur nga një kotec pulash në vend të shtëpisë.
Banori: Asnjë nga banorët nuk ka pranuar, show i Erjon Veliaj. Ka marrë dy familje që rrinë tek pularia dhe i ka çuar atje. Në ato kotecat le të shkojë të rrijë ai, unë jo. Do ti përçajë.
Banorja: Atë kotec që kam, atë të më japë. Banesën t’ia japë atij që ka nevojë, unë jam me shtëpi dhe nuk kam nevojë. Të më japë aq metër që do të më prishë. Të vijë të bëjë jo rrugë, por fushë aviacioni le ta bëjë.
Nëpërmjet ‘Twitter’-it, Edi Rama përgëzoi familjet që preken nga projekti i Unazës së Re dhe që po largohen nga shtëpitë e tyre, duke përfituar sipas ligjit për banesat sociale ose me bonus qiraje.
Rama shkruan se këto familje po ndahen nga lukunia e SHQUP-it. Sipas kryeministrit, hesapet e Lulzim Bashës s’kanë lidhje me interesat e qytetarëve.
