Banorët e 5 “Majit” në Tiranë nuk heqin dorë nga banesat e tyre. Ata kanë dalë sërish në protestë kundër shembjes së shtëpive që preken nga procesi i rindërtimit për zhvillimin e zonës së re. Ata shprehen të vendosur se do e mbrojnë me gjak pronën e tyre nëse tentojnë ti nxjerrin me forcë jashtë.
“Pse të bëj kontratë paraprake, ç’ është ky muhabet ta kam dhuru, kjo është super grabitje si pastrim parash. Ne nuk jemi Zvicër. Ku i gjen shteti këto lekë se Europa nuk po u jep -Duhet të rrethojmë bashkinë e ti fusim zjarrin me dokumente. Mos të mendojë që jemi të urtë, të sjellë noterin të caktojë shtëpinë dhe të caktojë metrat. Me gjak do e mbrojmë. Po bëjnë mafiozlliqe që të na shkelin me këmbë”, shprehen të revoltuar.
Një prej tyre tha se është absurde dhe kriminale situata e krijuar pasi në një kohë kur presidenti turk Erdogan ndërton 522 shtëpi për shqiptarët e prekur nga tërmeti, vetë shteti nxjerr jashtë popullin e vet pa asnjë lloj kontrate.
“Nuk kisha pa shtet që të marrë masa për popullin e vet, Erdogan i futi në shtëpi ata të tërmetit këta të nxjerrin nga shtëpia jote pa asnjë lloj kontrate”, ka thënë një tjetër banor.
Nesër është afati i fundit që të lirohen banesat sipas njoftimit të Bashkisë së Tiranës.
