Ky provokim në mënyrë flagrante shkel rregullat e UEFA-s, e cila është përgjegjëse për parandalimin e shfaqjes së sloganeve me përmbajtje provokuese
Shfaqja e banderolës ku shkruhej: “Greqia është fajtore. Kujtoni genocidin në Çamëri, 100.000 viktima shqiptare”, ka shkaktuar reagimin e ministrisë së jashtme greke. Zëdhënësi Efstratios Efthimiu i është përgjigjur pyetjes së një gazetari lidhur me një banderolë provokuese të shfaqur gjatë ndeshjes së futbollit Shqipëri-Zvicër:
“Shfaqja e një banderole me përmbajtje provokuese dhe nxitëse në ndeshjen e futbollit Shqipëri-Zvicër përbën një akt të paprecedent. Ky provokim në mënyrë flagrante shkel rregullat e UEFA-s, e cila është përgjegjëse për parandalimin e shfaqjes së sloganeve me përmbajtje provokuese dhe duhet të marrë masa të menjëhershme për të ndëshkuar përgjegjësit.
Qeveria greke proteston ashpër ndaj UEFA-s dhe organizatorëve francezë, prej të cilëve presim shpjegime se përse, pavarësisht rritjes së masave të sigurisë, banderola provokuese në fjalë ishte lejuar të futej në stadium. Një protestë gjithashtu po përgatitet për qeverinë shqiptare, nga e cila presim që ta dënojnë këtë veprim të papranueshëm dhe provokativ.
Është e qartë se këto veprime provokative po kryhen nga grupet ekstremiste që janë të pakënaqur me marrëdhëniet e ngushta greko-shqiptare dhe pranimin zyrtar të Ministrisë së Jashtme shqiptare se nuk ekziston çështja e “Çamërisë”, theksohet në deklaratën e zëdhënësit të ministrisë së jashtme greke.
