Nënkryetari i grupit Parlamentar të PS, Taulant Balla, tha sot se qëndrimet e Ben Blushit për ndryshimet në qeveri janë destruktive në dëm të PS-së dhe qeverisjes. Balla iu përgjigj Blushit pas komeneteve që ky i fundit bëri në media për ndryshimet në qeveri, ku tha se duhet ndryshuar qeverisja dhe jo disa ministra.
“Shpreh keqardhje për këtë reagim të Blushit që është në vazhdën e disa qendrimeve që janë në dëm të PS dhe në formë destruktive ndaj qeverisjes së PS. Më vjen keq që në reagim kur flet për ekonominë flet njëlloj si Saliu. Nuk e di ku e ka gjetur atë shifrën 400 lekë për 400 mijë të varfër në Shqipëri, por di të them që një deputet kur nuk shkon për 2 vjet në zonën zgjedhore dhe zgjedhësit i shkon në TV nxjerr këto lloj shifrash” tha Balla.
Blushi kishte deklaruar ndër të tjera se Rama e përdor si lodër, PS-në dhe qeverinë. Pasi sulmoi Blushin, Balla falenderoi ministrin e larguar, Shkëlqim Cani për kontributin e dhënë në Ekonomi, duke i uruar suksese Ahmetaj për të çuar përpara, sipas tij, betejën kundër informalitetit.
