Paratë e grumbulluara për Granit Xhakën dhe Xherdan Shaqirin do të shkojnë në ndihmë të tre fëmijëve të sëmurë. Ka qenë Ragip Xhaka, babai i Granit dhe Taulant Xhakës, që ka njoftuar se paratë e grumbulluara nga shqiptarët për të shlyer gjobën e FIFA-s do shkojnë për të ndihmuar fëmijët.
“Shenja e shqiponjës është si një tatuazh i gëzimit të shqiptarëve në festa, në dasma, në koncerte, në ndeshje futbolli dhe nuk ka brenda asnjë urrejtje apo madje asnjë lidhje me të tjerët, po është thjesht një shenjë dalluese që shqiptarët e njohin menjëherë e nuk kanë nevojë për shpjegime!
Prandaj edhe jemi shumë të çuditur me reagimin e atyre që e përjetuan shenjën tonë si ofensive për ta apo atyre që e trajtuan si gjest politik!
Por nuk jemi aspak të çuditur me solidaritetin e shumë shqiptarëve që janë ndjerë keq nga keqinterpretimet e shenjës dhe kanë marrë pjesë në iniciativën e Edi Ramës për të kontribuar simbolikisht për gjobën e padrejtë që na u vu!
I falenderojmë shumë jo për shumën, po për faktin që na kthyen 20 mijëfish gëzimin që u dhamë me shenjën e shqiponjës pas golave!
Të tre futbollistët e gjobitur për shenjën e shqiponjës kanë vendosur që paratë e mbledhura nga iniciativa e kryeministrit Rama të shkojnë për të ndihmuar tre fëmijë të sëmurë, një në Shqipëri, një në Kosovë dhe një në Zvicër”, u shpreh Xhaka.
