Vrasja e Nazmi Bandullës në Shkodër, ka ndodhur në vetëm pak sekonda. Siç shihet edhe në videon e siguruar nga gijotina.com autorët kalojnë para lokalit ku 55- vjeçari ishte ulur jashtë për të pirë kafen, me makinën tip “BENZ” të bardhe e xhama të zinj, hapin xhamin e parë dhe qëllojnë me breshëri plumbash.
Janë dashur vetëm 6 sekonda për të kryer ekzekutimin e Bandullës, personit me rekorde kriminale në vend. Në pamje dëgjohet edhe zhurma e armës, ndërkohë që viktima rrëzohet përtokë.
Autorët janë larguar në drejtim të paditur, ndërsa nuk ka ende gjurmë për identifikimin e tyre.
Duket se gjithçka është organizuar për të kryer me sukses vrasjen e Bandullës. Pista kryesore ku janë përqendruar hetimet janë larja e hesapeve, dhe përfshirja e 55-vjeçarit në grupet kriminale.
Për të ndihmuar në hetime dhe identifikimin e autorëve, policia ka shoqëruar rreth 20 persona, familjarë e banorë të lagjes për të dëshmuar. 5 nga personat e pyetur janë dëshmitarë okular. Përpara grupit hetimor ata janë shprehur se nuk kanë mundur të identifikojnë ekzekutuesit, përveç faktit që autorët udhëtonin me një automjet tip “BENZ”, me xhama të zinj.
Gjithashtu hetuesit kanë pyetur edhe familjarë të viktimës, por edhe këta nuk kanë dhënë asnjë ndihmesë për hetimin.
Policia ngriti postblloqe duke kontrolluar mjetet që qarkullonin në disa akse rrugore, por pa rezultat për identifikimin dhe kapjen e autorëve të kësaj ngjarjeje.
Deri në një moment të dytë të hetimeve, shpresojmë që kjo ngjarje mos u shtohet dosjeve të tjera kriminale që kanë zënë pluhur në prokurori duke lënë hetimet për gjysmë.
