Eksperti i sigurisë Gert Metani, ka analizuar atentatin që tronditi dje opinionin publik, ku u vranë në Lezhë çifti i bashkëshortëve Kreshnik dhe Gentiana Mujeci.
Metani ka deklaruar se kemi të bëjmë me një ngjarje të planifikuar dhe të mirëmenduar, që ka lënë jetim 4 fëmijë.
“Ngjarja është e rëndë, sepse është e gjithë familja, jo një person i vetëm. Duke qenë se është e përfshirë edhe bashkëshortja, këto ngjarje edhe nga organizatat më mafioze të mundshme, gjithmonë janë tentuar të ndahen, të goditet objektivi por të falen familjarët, fëmijët, bashkëshortja, prindërit, etj. Ngjarja ka marrë përmasa të mëdha, është goditur si familje duke lënë jetimë katër fëmijë. Është ngjarje e planifikuar, e mirëmenduar, futet te vrasja me paramendim dhe te grupi i strukturuar, pasi shohim që mund të jenë mbi dy mjete, apo disa autorë që kanë marrë pjesë. Grupi hetimor në Lezhë besoj që po bëjnë hetimet e tyre dhe do t’i çojnë përpara qoftë me pamjet filmike. Si ngjarje merr përmasa të rënda dhe e trondit opinionin publik dhe përmasën e sigurisë”, tha Metani.
Sipas tij, vrasësit mund të kenë qenë profesionistë. Megjithatë ai nuk e përjashton që të kemi të bëjmë edhe me amatorë që kanë shtënë me breshëri, duke vrarë edhe bashkëshorten e objektivit. Sipas Metanit arsye të krimit të dyfishtë mund të jenë motive si larje hesapesh, apo gjakmarrje.
“Ata që janë në nivel amator, që nuk vijnë nga formimi ushtarak, që s’e kanë përdorimin e armës si mjet apo trajnim nga këto struktura, Policia, Garda, Ushtria, po bëhen edhe më të zotë, sepse bëjnë trajnimin në zona rurale, dalin maleve, blejnë armë pa fund që futen nga kufiri me Malin e Zi dhe Kosovën. Këta persona mjaftojnë të koordinojnë 2-3 veprime dhe në sytë e një personi mund të duken si profesionistë.
Mund të jenë përfshirë motive si larje hesapesh, gjakmarrje, por nëse janë profesionistë janë njerëz të gabuar që nuk kanë marrë masat për të hequr çdo gjurmë. Një djegie mjeti s’ka ndodhur këtë herë. Me një hetim të mirë çdo gjë zbardhet. Kanë qenë profesionistë për fatin e keq pasi dy personat nuk jetojnë më, por janë lehtësisht të zbulueshëm, kur prokuroria dhe oficeri i policisë gjyqësore punojnë siç duhet. Objektivi mund të ketë qenë edhe zotëria në fjalë, i ndjeri. Nëse kanë qenë amatorë, goditja në breshëri ka bërë që mos shpëtojë as zonja. Kur përfshihen familjarë janë gjithmonë ose persona që paguhen për atë, ose që s’kanë ftohtësi”, tha Metani.
