Autorët kanë vëzhguar nga larg dhe kanë pritur fiks momentin për të ekzekutuar Nazmi Bandullën jashtë lokalit të kafesë në lagjen “Partizani”.
Nuk dihet ende sesa persona kanë bashkëpunuar për të kryer ekzekutimin, por bëhet me dije se ata kanë qëlluar nga një makinë në lëvizje.
Autorët hapën zjarr drejt “shënjestrës”, ku 3 plumba e lanë të vdekur në vend 55- vjeçarin Nazmi Bandulla, më pas janë larguar nga vendi i ngjarjes. Policia po bën krehjen e zonës ndërsa është duke kryer kontrolle në disa akse rrugore, në kërkim të mjetit të autorëve, që i vënë flakën për të humbur gjurmët.
Atentati ka ndodhur mëngjesin e sotëm rreth orës 08:15, ku autorët kanë vëzhguar dhe kanë pritur momentin për të ekzekutuar “objektivin”, në një kohë ku në lagje nuk kishte lëvizje të banorëve të tjerë.
Ky detaj shton dyshimet se kemi të bëjmë me një atentat të mirëorganizuar dhe vrasje të porositur.
Bandulla është një person me të shkuar kriminale. Në vitin 2020 Bandulla u paralajmërua përmes një atentati duke i vendosur tritol në makinë, ndërsa 3 muaj më parë, ai ishte arrestuar në flagrancë pasi, pak para mesnatës së shtatorit, ka kërcënuar me armë zjarri tip pistoletë, pas një konflikti për motive pronësie, vëllanë e tij të identifikuar si A. Bandulla. 38-vjeç, i cili banon në të njëjtën ndërtesë me autorin.
Policia po heton ende për veprimtaritë kriminale ku Bandulla është përfshirë, për të rënë kështu në gjurmët e para të autorëve për këtë vrasje, për të cilën nuk përjashtohet as pista e larjes se hesapeve.
Shërbimet e Policisë kanë rrethuar zonën dhe vijon krehja e saj, me qëllim kapjen e autorit.
Grupi hetimor ndodhet në vendngjarje dhe nën drejtimin e Prokurorisë vijon punën për sqarimin e plotë të rrethanave të ngjarjes.
