Kryeministri Edi Rama ka njoftuar se nga dita e enjte do të nisë zbatimi i urdhrit për mbajtjen e maskës me detyrim edhe në rrugë, ndërsa do të aplikohet edhe gjobë.
“Të mërkurën do të publikojmë masën dhe masat ndëshkimore. Dhe nga dita e enjte të gjithë me maskë sapo nxjerrin veten nga shtëpia kudo, kudo, kudo. Dhe gjobat do të zbatohen në kohë reale. Nuk do të ketë asnjë mundësi për t’ju shmangur gjobave sepse do t’i zbatojmë me OSHEE”, tha Rama.
Rama tha se kontrollin e qytetarëve do të bëjnë policia bashkiake dhe ajo e shtetit. Nëse dikush kapet pa maskë, ai do të gjobitet dhe shuma do t’i kalojë si detyrim tek fatura e energjisë elektrike.
Sipas kryeministrit Rama mbajtja e maskës me detyrim edhe në ambiente publike është e vetmja mënyrë për të mos shkuar në një mbyllje të dytë.
