Shumë artistë shqiptarë janë prekur nga lajmi se kantautori i njohur, Francesk Radi është ndarë nga jeta në moshën 67-vjeçare.
Me anë të postimeve në rrjetet e tyre sociale artistët shprehin ngushëllimet ndërsa e kujtojnë Françesk Radin për artin e tij, pavarësisht sakrificave që duhet të bënte.
“Lamtumirë Franko, artisti modern e i guximshëm krijoi e guxoi në një kohë të zymtë për Shqipërinë ku artisti edhe mund të dënohej pse ishte ndryshe… vuajti e kurrë s’u ankua… por u kthye përsëri në këngën me stilin që vetëm ai e kishte. Qofsh i Parajsës. Ngushëllimet më të sinqerta familjes. Rrojmë të gëzuar, me derë të blinduar. Të huajt punojnë, Shqiptarët të rrojnë, Ky fat na ra (disa vargje kaq të vërteta te një kënge të tij),” – shkruan këngëtarja, Aurela Gace.
“Lamtumirë Franko. Francesk Radi, artisti që vuajti pafund, por kurrë nuk u përul, duke i dhuruar publikut të vendit të tij kënaqësinë e të paturit në fondin e artë një qenie të lirë artistike. Franko, faleminderit për cdo notë dhe emocion që na dhurobe. U prehsh në paqe mjeshtër,” – shkruan aktori i humorit, Julian Deda.
“Artisti i cili vetëm shpirt të madh, melodi dhe urtësi reflektonte. Vazhdo të na reflektosh njësoj dhe nga qielli,”– shkruan producenti, Flori Mumajesi.
“U prehsh në paqe,” – shkruan moderatorja, Marina Vjollca.
