Është ndarë nga jeta Vitore Sallaku, ish-akrobate dhe pionere e Cirkut Kombëtar. Sallaku u nda nga jeta në moshën 80-vjeçare. Akrobatja ishte bashkëshortja e Skënder Sallakut, artistit të njohur të humorit i cili u nda nga jeta në vitin 2014 pasi vuante nga një sëmundje e rëndë.
“Artistja e Merituar” dhe “Mjeshtra e madhe të punës”, ishte pjesë e trupës së cirkut që në moshën 11-vjeçare. Puna e saj e fundit ka qenë një libër biografik për bashkëshortin e saj Skënder Sallaku, ndërkohë që numëron edhe 5 libra të tjerë të botuar mes të cilëve tre janë me poezi.
Kujtojmë se, Sallaku është lindur në Tiranë, përfundoi studimet në liceun artistik “Jordan Misja” dhe ato të larta në Institutin e Kulturës Fizike “Vojo Kushi”. Është një nga akrobatet më të spikatura të arenës së cirkut që për më shumë se 35 vjet i dha skenës numra të paarritshme dhe sot.
