Gjykata e Tiranës ka lënë në burg 27-vjeçarin Eno Papa, të cilit iu zbulua një depo me arsenal armësh.
Në sajë të operacionit “Silent 2” tre ditë më parë në një magazinë të marrë me qera pak kohë më parë nga Eno Papa, policia sekuestroi 2 snajpera, 4 kallashnikov, 2 armë automatike, 4 pistoleta me silenciator, tre kallëpe tritoli.
Lidhur me ngjarjen, grupi hetimor, bënë me dije se armët e sekuestruara, disa prej të cilave edhe ishin modifikuar e përshtatur si snajper me shënjestra optike, do përdoreshin për ekzekutime mafioze.
Nga ana tjetër, hetuesit tregohen mjaft të rezervuar në dhënin e detajeve, pasi hetimet janë ende në vijim për të zbardhë edhe atentate, apo tentativa vrasjes që kanë ndodhur vitet e fundit.
Hetuesit janë duke kryer hetime itensive për identifikimin e personave të tjerë që janë pas këtij aktiviteti, pasi i riu i arrestuar nuk është i vetëm i përfshirë në ketë aktivitet kriminal.
Ndërkohë, armët janë dërguar në laboratorin e ekspertizës jo vetëm për të mësuar nëse këto armë janë përdorur në ngjarje kriminale, por edhe për të gjetur shenja gishtërinjsh apo gjurmë ADN-je, të personave të tjerë tek armët e sekuestruara.
