Edmond Themelko akuzohet për manipulim të proceseve zgjedhore në Maqedoni
Është arrestuar në Maqedoni, kryetari i Bashkisë së Pustecit, Edmond Themelko. Arrestimi i Themelkos është kryer me udhrër të prokurorisë speciale në Maqedoni. Mediat maqedonase bëjnë të ditur se kryebashkiaku i Pustecit, akuzohet për manipulim të proceseve zgjedhore në Maqedoni. Ndalimi është bërë në Maqedoni, ndërsa sot paradite në Bashkinë Pustec, Themelko nuk është paraqitur, edhe pse kishte mbledhje të Këshillit Bashkiak. Sipas agjencisë shtetërore të lajmeve në Maqedoni, rasti i parë që prokuroria speciale hapi një procedurë hetimore, është çështja “Titanik”. Prokurorja Fatime Fetai, në konferencë për shtyp tha se hetimi është hapur për shkeljen e të drejtës zgjedhore, rryshfetet gjatë zgjedhjeve apo shkatërrimin e materialeve zgjedhore në vitin 2012. Në njoftim thuhet se zyrtarë të Ministrisë së Brendshme, të Transportit dhe institucione të tjera kanë shfrytëzuar ndikimin për të krijuar veprën penale të ndihmës për një parti politike në zgjedhje.
