Arrestohen 5 zyrtarët e Gjegjanit/ Vodhën 35 mln lekë të landfillit të mbeturinave

Me kërkesë të Prokurorisë së Elbasanit, gjykata ka vendosur masën e sigurisë “arrest në burg” për 5 zyrtarë të Njësisë Administrative Gjegjan, të dyshuar për “Shpërdorim detyre”, “Falsifikim dokumentesh” dhe “Korrupsion pasiv”, për një dëm ndaj shtetit në shumën rreth 35 milionë lekë të reja. Gjithashtu, për 5 zyrtarë të tjerë, është vendosur masa e sigurimit “Detyrim për paraqitje”.

Zyrtarët e ish-komunës Gjegjan, aktualisht Njësi Administrative, përfshirë edhe titullaren e njësisë, kanë kryer veprime fiktive në të paktën dy procedura prokurimi, duke përvetësuar thuajse tërësisht shumë e parave të caktuara për ndërtimin e një landfilli mbeturinash në zonë, si edhe të pyllëzimit të një sipërfaqe 50 hektarë me pemë shegë.

Prokuroria e Elbasanit bën me dije se “Nga ish-komuna Gjegjan është prokuruar fondi 1.250.000 lekë për ndërtimin e landifillit të mbeturinave në këtë zonë, në vitin 2014. Ky punim duhej të mbyllej brenda vitit. Aktualisht, nga veprimet hetimore të Prokurorisë, rezulton se landifilli jo vetëm që nuk është ndërtuar, por e gjithë zona është e rrethuar dhe përdoret nga një subjekt privat. Ndërkohë, në dokumentet e ish-komunës Gjegjan dhe aktualisht Njësia Administrative Gjegjan, rezulton që landfilli është përfunduar dhe vënë në punë. Për këtë prokurim fiktiv është bërë edhe pagesa, pavarësisht se puna nuk është kryer.”

“Po në vitin 2014, ish-komuna Gjegjan ka realizuar prokurimin publik për pyllëzimin të 50 hektarë tokë bujqësore me pemën Shegë, me vlerë 32.5 milionë lekë të reja. Sipas parashikimit, pemët këtë vit duhej të nisnin të jepnin prodhimet e para. Ndërkohë, nga kqyrja në terren, rezulton se në hapësirën bujqësore të prokuruar, nuk rezulton thuajse asnjë pemë shegë. Po për këtë prokurim, shuma e parashikuar rezulton e paguar e gjitha.”-rezulton nga hetimet përkatëse të Prokurorisë së Elbasanit.

Në këto kushte Prokuroria kërkoi caktimin e masave të sigurisë për shtetasit, si më poshtë:

Masë sigurimi “Arrest në burg” për shtetasit:

1. Lumturi Hoxha, Administratore e Njësisë Gjegjan (ish-kryetare e Komunës Gjegjan), shpallur në kërkim
2. Ylli Ago, punonjës i Njësisë Administrative Gjegjan, arrestuar
3. Bardhyr Sharra, punonjës i Njësisë Administrative Gjegjan, shpallur në kërkim
4. Fatmir Lamçja, punonjës i Njësisë Administrative Gjegjan, arrestuar
5. Rexhep Hoxha, punonjës i Njësisë Administrative Gjegjan, arrestuar

Masë sigurimi “Detyrim për paraqitje” për shtetasit:

1. Sofije Topuzi
2. Bashkim Sali
3. Ardian Lloshi
4. Tefik Venari
5. Agim Ago