Policia e Elbasanit ka arrestuar dy persona, ndërsa ka proceduar në gjendje të lirë edhe tre të tjerë, pasi u është kapur kokainë në makinën me të cilën ata ishin duke lëvizur.
Policia bën të ditur se në pranga janë vënë shtetasit E.A., 28 vjeç, dhe T.Ç., 28 vjeç, ndërsa procedimi ka nisur ndaj M.U., 31 vjeç, D.G., 20 vjeç dhe E.Rr., 21 vjeç, të gjithë banues në Elbasan.
“Gjatë kontrollit të ushtruar nga policia në mjetin “Volkswagen” që qarkullonin këta shtetasit, policia gjeti dhe sekuestroi në cilësinë e provës materiale 8 doza lëndë narkotike kokainë, automjetin me të cilin qarkullonin dhe 2 aparate celularë. Vijojnë hetimet për zbulimin dhe identifikimin e personave të tjerë të përfshirë në këtë aktivitet kriminal”, thuhet në njoftimin e policisë.
