Kryeprokurori dhe kreu i Policisë së Shtetit takim pas arrestimit të Shullazit
Prokuroria e Krimeve të Rënda ka lëshuar urdhër-ndalimi për Emiljano Shullazin me akuzën e pjesëmarrjes në grup të strukturuar kriminal, por edhe për kërcënim ndaj kandidat për rektor të Universitetit të Tiranës, Mynyr Koni. Burime nga policia bëjnë të ditur se së bashku me të është arrestuar edhe kushëriri i tij Blerim Shullazi dhe shoku i tij Gilmando Dani. Akuza që rëndon mbi ta është ajo e shantazhit dhe përvetësimit të pronës.
Lajmin e bënë të ditur burime të prokurorisë. Mbreme ka patur një takim mes kryeprokurorit Adriatik Lalla, kreut të Policisë së Shtetit, Haki Cako, prokurorit të Tiranës, Petrit Fushaj, dhe kreut të policisë së Tiranës, Ervin Hodaj. Shullazi u ndalua pranë banesës së tij në rrugën e Kavajës, ndërsa kushëriri i tij Blerim Shullazi u ndalua në Krujë. Mësohet se gjatë operacionit forcat e policisë kanë zhvilluar dhe kontrolle në banesën e Shullazit dhe miqve të tij.
Mynyr Koni është marrë në pyetje mbrëmë nga policia ku ka deklaruar se është kërcënuar me jetë nga Emiljano Shullazi. Ndërsa Shullazi u ka thënë policëve se nuk ka lidhje me kërcënimin ndaj Konit.
NJOFTIMI I POLCISE
Burime zyrtare nga policia bëjnë të ditur se është ekzekutuar urdhri i ndalimit i Prokurorisë së Krimeve të Rënda Tiranë për ndalimin e tre shtetasve për veprën penale të “Shkatërrimit të pronës me eksploziv”, ndaj shtetasit A. Z., me qëllim kanosjen e tij për fitimin e pasurisë në mënyrë të padrejtë.
Më datë 17.04.2016, në orën 01:30, u bë ndalimi i shtetasve:
- Emiljano Shullazi, 38 vjeç, banues në Tiranë.
- Gilmando Dani, 38 vjeç, banues në Tiranë.
- Blerim Shullazi, 32 vjeç, banues në Krujë.
Ndalimi i këtyre shtetasve është bërë sepse në bashkëpunim me njëri-tjetrin dhe me persona të tjerë në kohë dhe qytete të ndryshme, kanë shtrënguar nëpërmjet kanosjes për dhënien e pasurisë në mënyrë të padrejtë biznesmenë të ndryshëm.
Prokuroria për Krimet e Rënda Tiranë, për tre shtetasit e sipërpërmendur, ka regjistruar një sërë procedimesh penale për veprat penale “Shtrëngimi me anë të kanosjes ose dhunës për dhënien e pasurisë”, “Shkatërrim i pronës me eksploziv”, “Prodhimi dhe mbajtja pa leje e armëve luftarake dhe e municionit” dhe “Grup i strukturuar kriminal”, parashikuar nga Nenet 109/b, 152, 278/4, 283/a dhe 333/a Kodit Penal.
