Ish-kryeministri Sali Berisha ka reaguar pas arrestimit të ish-kryebashkiakut të Vorës, Agim Kajmaku pasi u kap me 20 kg drogë në Itali sëbashku me nipin e tij. Lideri i Partisë Demokratike, u shpreh se prangosja e Kajmakut, i cili ishte shpallur në kërkim në Shqipëri, pasqyron “qartë dhe pastër fytyrën e kësaj qeverie”.
Sipas Berishës, Rama ka shpërblyer me poste trafikantë dhe kriminelë pasi siç shkruan ai kriteret e kryeministrit për krijimin e qeverisë së tij nuk kanë qenë as arritjet profesionale e akademike, por rekordet kriminale.
Berisha shkruan në postimin e tij në Facebook se miqtë e Ramës po përfundojnë në qeli njëri pas tjetrit dhe ai nuk ka marrë përgjegjësitë që i takojnë në mënyrë të drejtpërdrejtë.
Postimi:
Ish Narko-Bashkiaku i Edvinit përfundon në burg!
Agim Kajmaku trafikonte kokaine me padronet e tij ne qeveri!
Miq, është arrestuar në Itali, ish-kryebashkiaku i Vorës, Agim Kajmaku. Narko-Bashkiaku është kapur me 20 kg kokainë në Itali, duke pasqyruar qartë dhe pastër fytyrën e kësaj qeverie. Kryenarkomani Edi Rama ka shpërblyer me poste dhe para, trafikantë droge, vrasës e hajdutë të cilët kanë ushtruar detyrat e caktuara nga ai. Është e turpshme sesi kjo qeveri drejtohet nga këta kriminelë dhe njerëzit e tyre, që në shumicën e rasteve kanë më shumë se dy emra dhe një të kaluar të errët. Kriteret e Edi Ramës për krijimin e qeverisë së tij nuk kanë qenë as arritjet profesionale e akademike, por rekordet kriminale. Personat me vrasje, aktive në boten e krimit, krerë organizatash kriminale, kanë predispozitën për të qenë drejtues nën petkun e Edi Edi Ramës. Njëri pas tjetrit, miqtë e tij po përfundojnë në qeli, ndërkohë që me papërgjegjshmërinë më të madhe ky njeri nuk ka marrë kurrë përgjegjësitë që i takojnë në menyrë të drejtpërdrejtë. Këtu nuk bëhet fjalë për veprime individuale, por për inkriminim kokë e këmbë të Edi Ramës dhe qeverisë së tij.
