Theu masën e sigurisë dhe dhunoi të atin
Gjykata e Tiranës ka dhënë masën e sigurisë arrest me burg për Vladimir Gjutën, i cili akuzohet për dhunë në familje dhe thyerje të masës së sigurisë.
Pak ditë më parë, 78-vjeçari Ferit Gjuta, babai i Vladimir Gjutës, ka kallëzuar penalisht në komisariatin nr.5 në Kamëz të birin, me pretendimin se ai ushtronte dhunë sistematike ndaj tij.
Sipas policisë, duke shkuar në banesën e të atit, shtetasi Vladimir Gjuta ka shkelur edhe vendimin e datës 22 prill 2016 të lëshuar nga Gjykata e Shkallës së Parë të Kukësit, e cila kishte marrë masën e sigurisë “arrest shtëpie”.
Avokati i Gjutës ka kërkuar masë mjekësore, duke thënë se klienti i tij ka çrregullime mendore, të cilat i janë shkaktuar gjatë qëndrimit në burg. Ai u shpreh se Gjuta ka disa kohë që merr mjektim.
Vladimir Gjuta u arrestua qershorin e vitit të kaluar, bashkë me nipin e tij Baftjar Bruka, me akuzën e organizatorit të vendosjes së tritolit në farmacinë e Bashkim Tahirit, babait të ministrit të Brendshëm Saimir Tahiri. Por më 5 maj u lirua nga burgu për mungesë provash.
