Dështon ankandi edhe për shitjen me gjysëm vlere
Është kthyer tashmë në një kompani që “s’ke ç’e do”. ARMO që dikur mbante 25 për qind të tregut të karburanteve në vend nuk është shitur as në ankandin e dytë ku ofrohej me gjysëm çmimi.
Rrënimi i kësaj kompanie gjigande është “vepër” e sipërmarrësit shqiptar Rezart Taci i cili e bleu atë nga shteti vite më parë për 85 milion euro. Por transaksionet e dyshimta të Tacit, kreditë e pafundme si edhe borxhet në organet fiskale bënë që ai ta linte peng kompaninë për borxhet e marra. Kështu në administrimin e ARMO-s u vu kompania nga Azerbajxhani, Heany Assets Corporation, që kisht 85% të aksioneve por që në të vërtetë e braktisi ARMO-n.
Më pas kompania kaloi për llogari të shlyrjes së kredive, dhe shitja më e fundit u tentua të bëhet nga shoqëria përmbarimore EPSA. Vetëm pak ditë më parë EPSA kishte njoftuar nxjerrjen në shitje (për së dyti, dmth me gjysëm cmimi: pra për 10 milion uro) të uzinës se përpunimit të naftës të rafinerisë së ARMO, (truall dhe ndërtesa në fshatin Drizë) për llogari të Bankës Raiffeisen, për një kredi të pashlyer prej 20 milionë euro.
ARMO është kompania me kredinë më të madhe në listën e 35 kreditorëve të mëdhenj që kanë rreth 65 për qind të totalit të huasë në vend. Në Shqipëri, ARMO ka kredi prej rreth 37 milionë euro, pjesa më e madhe e të cilave ndaj Raiffeisen dhe Credins, përkatësisht rreth 20 dhe 15.6 milionë euro. Por kompania ka edhe një tjetër borxh më të madh të jashtëm ndaj bankës FBME dhe palëve të treta, me një vlerë prej 140 milionë euro.
Përvec këtyre ARMO ka një detyrim të papaguar për tatimet në vlerën 50 milion euro.
