Mbledhjen e ditës së djeshme të Këshillit Bashkiak , kryebashkiaku Qazim Sejdini ka dhënë propozim për dhënien e këtij titulli Armondo Sadikut. Edhe pse jo në rend dite, u ra dakord që propozimi i kryebashkiakut të merrej parasysh. Këshilltarët aprovuan në moment propozimin për Sadikun duke mos e shtyrë propozimin si rend dite për mbledhjen e ardhshme.
Gjatë këtij momenti nuk munguan as duartrokitjet në sallën e mbledhjes, në shenjë mirënjohje për sulmuesin elbasanas të Kombëtares, i cili shënoi edhe golin historik në Europianin e Francës, i pari për Shqipërinë në një kompeticion të tillë.
Sadiku nuk ka qenë prezent në mbledhje por pritet që të bëhet një ceremoni për dhënien e këtij titullli. Elbasani e ka nderuar për herë të dytë futbollistin. Sulmuesi mori një certifikatë “Mirënjohja e Qytetit” pas golit ndaj Armenisë dhe arritjes në Europian.
“Propozoj Armando Sadikun për kontributet e mëdha që ka dhënë, ta shpallim ‘Qytetar Nderi’ të Elbasanit. Si një nga ambasadorët e qytetit të Elbasanit dhe më gjerë në Europë, si një përfaqësues i denjë jo vetëm i futbollit, por edhe i qytetarisë elbasanase. E bëj këtë propozim duke pasur parasysh edhe faktin tjetër që ky djalë i qytetit me korrektësinë, kontributin dhe punën e tij na ka nderuar të gjithëve”, u shpreh Sejdini gjatë mbledhjes.
