Në pritje të vendimit të Gjykatës së Lartë
Pas kushtëzimit të bërë nga Partia Demokratike, deputeti socialist Armando Prenga është vetëtërhequr nga Kuvendi. Vendimin e tij deputeti e ka bërë të ditur me një letër që i dërgonte kryetarit të Kuvendit ku shkruan se “Edhe pse plotësisht i bindur në pafajësinë time dëshiroj të mbetem larg jetës parlamentare për sa kohë Sali Berisha dhe Lulzim Basha, që duhej të ishin përpara drejtësisë, më kanë kthyer në tabelë qitjeje se nuk dinë të bëjnë punë tjetër”.
Vetëlargimi i njoftuar i Prengës do të zgjasë derisa Gjykata e Lartë të marrë një vendim për fajësinë ose jo ndaj personit të tij.
Deputeti socialist i qarkut të Lezhës, Armando Prenga është në gjykim për tre akuza mes tyre plagosje e lehtë.
Dy ditë më parë Partia Demokratike kushtëzoi marrëdhënien me parlamentin me nisjen e zbatimit të ligjit të dekriminalizmit. Po ashtu PD ka vënë si kusht edhe largimin e deputetit Armando Prenga nga Kuvendi. Deputeti Prenga akuzohet nga prokuroria per tre akuza armëmbajtje pa leje, plagosje e lehtë dhe kanosje për jetën. Ngjarja për të cilën akuzohet ndodhi në 8 shtator ne qytetin e Laçit ku Prenga u përfshi në një konflikt me familjen Çali nga Patoku, për Lagunën e Patokut, ku mbetën të plagosur dy persona.
