23 vite më parë një djalë i ri vendos ti përkushtohet pasionit të tij duke hapur sallonin e tij të bukurisë, i cili nuk do ishte një “berberhane” e thjeshtë vetëm për meshkuj, por me një vizion të qartë do të synonte tregun e bukurisë për të dy gjinitë. Ardian Borova është një nga ekspertët më të mirë në vend për flokët duke e kthyer atë dyqan të vogël të dikurshëm në një akademi bukurie, ku përgatit të rinjtë që duan të marrin këtë zanat.
Besnikëria e klientëve të tij është baza e këtij suksesi tashmë prej dekadash. Në duart e Borovës kalojnë shumë nga VIP-at e Tiranës, gazetarë e politikanë, misse dhe modele, por pa lënë mënjanë klientët e tij të hershëm, ata që i besuan që në nisje dhe vazhdojnë të jenë besnikë në këtë rritje të suksesit të tij, si një nga ekspertët e bukurisë në vend. “Shumë figura të njohura në fushën e artit, politikës dhe medias kanë krijuar imazhin e tyre publik, duke i besuar vetëm duarve të Borovës. Shumë prej tyre, sidomos të rinjtë, duan të ndryshojnë pamjen dhe stilin vetëm në besim të tij”, thuhet në faqen zyrtare të sallonit të Borovës.
Por, në të njëjtën kohë ai nuk synon të fitojë famë nëpërmjet klientëve të tij VIP-a duke mos publikuar emra dhe as foto të tyre në sallonin e tij, ndoshta një mënyrë kjo me të cilën ka ruajtur konfidencialitetin dhe vazhdimin e besimit të ndërsjelltë.
Në marrjen në dorë të flokëve të grave nga një parukier mashkull ai rrëzoi ndarjen “gra” dhe “burra” duke e parë zanatin e bukurisë si shërbim për të gjithë. Pra berberi i dikurshëm nuk është thjesht një berber i burrave të lagjes, por më shumë se kaq, është stilist, është ideator, është artist.
Ideja e krijimit të sallonit të bukurisë “Ardi Borova”, filloi gjatë vitit 1993, që u konkretizua me hapjen e tij në vitin 1994. Borova Salon është projektuar për të sjellë trendet e tregut shqiptar trajtimet e fundit evropiane të flokëve. “Që nga nisja, parimi kryesor i Borovës ishte shërbimi cilësor dhe me standarde perëndimore në çdo gjë e ofruar në sallon e tij, duke thithur klientët me kërkesa të larta”, thuhet në faqen prezantuese të sallonit.
Në vitet 1996-1997, Borova vjen me një përvojë të re të fituar në Perëndim, i specializuar në Itali dhe Francë. Filloi të jetë pjesë e ngjarjeve kryesore artistike dhe kulturore në vend. Ka marrë pjesë në shumë shfaqje të kohës, më e famshme ishte konkursi i bukurisë “Miss Evropa 1996” dhe festivalet e këngëve të Radio Televizionit Kombëtare të Shqipërisë.
Në vitin 1997 Borova vendosi të tregojë aftësitë e tij në një dimension të ri, në edukimin e të rinjve që aspirojnë të jenë pjesë e kësaj fushe duke themeluar shkollën e tij të parukerisë. Me qindra të rinj të trajnuar nga Borova tashmë kanë hapur sallonet e tyre, ose janë pjesë e stafit në sallone të famshme në Tiranë dhe jo vetëm.
